noch was zum schmunzeln, da macht dir das linsenkochen sicher gleich doppelt so viel spaß! :D
Saure Leisa mit Spätzla ond Soidawürschdla
En onsrer Gegend gibts an alda Brauch,
ma braucht bloss Leisa ond an grauchda Bauch,
a Hand voll Mehl, Schmalz, Essig gscheide Oier -
des gibt was Guats ond isch au gar net duier.
An Hafa Wasser stellsch jetzt auf da
Herdnau nemmsch dia Leisa grad so wia sichs gheart,
leers samt am Pfeffer ond dem grauchta Bauch ens Wasser nei.
´S gibt Leit dia woichat d´Lensa vorher ei,
des isch net neadig weil sonscht gibts an Brei.
Ma lupft bloss ab und zu da Deggel -
weil - wenns Wasser weg isch bisch dr Seggel.
Nemm jetzt des Mehl und hau fünf Oier nei.
a Händle Grias ond Muskat - nau wirds fei,
nau schlechsch da Doig mem Leffel so lang bis er Blosa schmeisst!
Heit wirds guat, denn i koch mir was Feins, weil i morga om Fünfe verreis,
i ess en Rom Spaghetti gern - oder Rösti dann en Bern,
nach London nemm i mir Bixa mit.
Ma isst Gulasch mit Knödel in Wien, oder Döner mit Soß en Berlin.
Ond en Moskau ess i Borschtsch - obgleich er noch unerforscht(sch) -
doch bei Lensa komm i schier drübernei!
Schdell dann dei Spatzawasser na,
weil jetzt gadds los ond nacher denksch net drah,
em dritta Hafa machsch dei Schmalz hoiss -
a anders Fett gadd au weil manchmaul hasch kois.
Jetzt duasch des Mehl nei ond gleich riachts ganz fei,
no rührsch mem Besa weil sonschd brennts dr nei -
sobald des brau wird leersch nau schöpferweis dia Lensa drauf.
Nach onsrer Moinong gherat Spätzla gschabt -
doch isch net jeder handwerklich begabt.
Für solche Leit gibts Drugger oder Hobel -
doch so a handgschabts Spätzle isch halt nobel.
Mit Gwürz und Essig schmeckschd des Ganze ab,
jetzt kommt d‘ Belohnung fer dui ganza Plaug -
hock an da Tisch ond fang ganz konzentriert zom Essa ah.
So a Essa des isch halt a Gnad oifach guat ond ma braucht koin Salat,
Hasch ganz Hongrige drbei - duasch no Soitawirschtla nei,
pro Person jeweils ois oder zwoi (oder drei oder vier).
Morga mach i an Boga om d‘ Waug - weil i Leisa ond Spätzla so mag -
Au mei Deller isch scho leer - gib da Hafa nomml her!
Ja bei Lensa komm i schier drüber nei!
